ហ្សេលេនស្គី ថាអ៊ុយក្រែនពិតជាដឹងគុណសហរដ្ឋអាមេរិក ជាពិសេសលោក ដូណាល់ ត្រាំ

បរទេស៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃអាទិត្យ ទី២៣ ខែវិច្ឆិកា បាននិយាយថា អ៊ុយក្រែនពិតជាដឹងគុណចំពោះសហរដ្ឋអាមេរិក និងប្រធានាធិបតី លោក ដូណាល់ ត្រាំ សម្រាប់កិច្ចប្រឹងប្រែងទាំងអស់របស់សហរដ្ឋអាមេរិកដើម្បីជួយទីក្រុងកៀវ។

ការលើកឡើងបែបនេះរបស់លោក ហ្សេលេនស្គី ធ្វើឡើងក្រោយលោក ត្រាំ បាននិយាយថាមេដឹកនាំអ៊ុយក្រែនមិនបានបង្ហាញការដឹងគុណទាល់តែសោះចំពោះការជួយរបស់សហរដ្ឋអាមរិក។ នៅក្នុងការបង្ហោះលើ Telegram លោក ហ្សេលេនស្គី បានគូសបញ្ជាក់ដូច្នេះថា «អ៊ុយក្រែនពិតជាដឹងគុណចំពោះសហរដ្ឋអាមេរិកចំពោះទឹកចិត្តរបស់ប្រជាជនអាមេរិក និងជាពិសេសចំពោះលោកប្រធានាធិបតី ត្រាំ សម្រាប់ការជួយដែលចាប់ផ្ដើមជាមួយមីស៊ីល Javelin ដែលបានជួយសង្រ្គោះអាយុជីវិតប្រជាជនអ៊ុយក្រែន»។

លោក ហ្សេលេនស្គី ក៏បានអរគុណផងដែរដល់អឺរ៉ុប ក្រុមប្រទេស G7 និង G20 ដែលបានផ្ដល់ការគាំទ្រដល់អ៊ុយក្រែន ដោយសង្កត់ធ្ងន់ថាកិច្ចប្រឹងប្រែងដើម្បីបន្តរក្សាការគាំទ្រពិតជាមានសារៈសំខាន់។ លោក បន្ថែមថា «នេះជាអ្វីដែលយើងកំពុងប្រឹងប្រែងយ៉ាងប្រុងប្រយ័ត្នគ្រប់ចំណុច និងគ្រប់ជំហានទាំងអស់ឆ្ពោះទៅរកសន្តិភាព។ អ្វីៗគ្រប់យ៉ាងត្រូវតែដំណើរការដោយត្រឹមត្រូវ ដូច្នេះទើបយើងអាចបញ្ចប់សង្រ្គាមនេះយ៉ាងពិតប្រាកដ និងបង្ការកុំឱ្យសង្រ្គាមកើតឡើងជាថ្មី»៕ (Reuters)